| عايزة اتجوز.................. | |
|
|
كاتب الموضوع | رسالة |
---|
mohra sayra
عدد المساهمات : 868 نقاط : 1564 الموقع : egypt
| موضوع: عايزة اتجوز.................. الجمعة أبريل 02, 2010 3:08 am | |
|
حبيت انقل لكم الموضوع دة وخصوصا البنات لأن المقال دة بيناقش مشاكل البنت فى مجتمعنا الشرقى بأسلوب ساخر وكوميدى وهو للكاتبة الشابة غادة عبد العال وأكتر حاجة تضحك فى الموضوع دة واقعيته ودة أكبر دليل ان واقعنا ملىء بالكوميديا وهى كوميديا سوداء
سموا كده و خليكوا معايا واحدة واحدة...خلينا نتفق الأول ان موضوع الجواز و العرسان و تأخر الجواز ده موضوع حساس جدا..وصعب جدا انكوا تلاقوا حد بيتكلم فيه بصراحة..خصوصا بالنسبة للبنات....لأن اللي بتتكلم فيه بصراحة يا إما بيتبصلها على إنها قليلة الأدب و ماتربتش ..يا إما على انها مسروعة ع الجواز ..يا إما على انها بارت و مش لاقيه حد يتجوزها..
عشان كده تلاقوا بنات كتير بتقول ..جواز ايه بلا نيلة ..يعني هم اللي اتجوزوا كانوا خدوا ايه...انا قاعده في بيت أبويا معززة مكرمة ,ايه اللي يخليني أروح أتبهدل مع حد ماعرفوش..أنا ما بافكرش في الجواز دلوقتي لما أبني مستقبلي ..و الجملة المستهلكة في كل الأفلام العربية .."لما أحقق ذاتي ""...مش عارفه ايه ذاتها دي و تحققها ازاي يعني
يمكن فيه بنات كتير ليهم طموح في دراستهم و في شغلهم ..لكن أتحدي ان أي واحدة فيهم مايكونش طموحها الأول انها تبقى زوجة ..على الأقل لأن دي الطريقة الوحيده اللي تخليها تبقى أم
نتفق بقه على أسس تانية مهمة ....عدد البنات في مصر أكبر من عدد الرجاله
دي نقطة أساسية مش عايزة أي حد يناقشني فيها ..و سيبوكوا بقه من إحصائيات الحكومة اللي بتقولك عدد الإتنين زي بعض ..لأن دي إحصائيات عاملة بالظبط زي درجات الحرارة اللي بيعلنوها في النشرة ..يعني الناس بتحلف بالطلاق ان الحرارة أكيد فوق ال 45 ..و هما لا يمكن يزودوها عن 38..في واحد قاللي ممنوع يذيعوا ان الحرارة فوق ال42 عشان السياحة ماتنضربش و السياح مايهربوش
موضوع نسبة الإناث للذكور برده فيها لعب بالطريقة دي..ليه بقه النسبة أكبر؟ أقولكم
موضوع الستات اللي بيقعدوا يخلفوا عشان يجيبوا الولد..يعني فيه عائلات كتيرة تلاقيها كده..4 بنات وولد..5بنات وولد..6 بنات وولد ..و هكذا...و تفضل الست تخلف تخلف عشان البأف جوزها يجيله الواد..يجيبوا يعمل بيه ايه؟ ماتعرفش ..و بيجي في الآخر خايب و نايب و يقعدوا يدلعوا فيه لما يطلع فسدان و يضيعهلم اللي وراهم و اللي قدامهم و اللي جنبهم كمان...
نقطة تانية .. الرجالة بقوا حاسين بنفسهم و بيتكبروا على خلق الله من البنات و تلقي الراجل قاعد هو و أمه يتشرطوا ...لازم تبقى بيضا و شعرها بني و عينيها عسلي و شبه نيللي كريم .. طب بص لنفسك في المرايه الأول ..طب بلاش بيقولوا الراجل مايعيبوش الا جيبه ..طب شبرقنا كده و ادخل في ايدك ان شالله علبة ملبس ..ألا لأ هو و امه يروحوا يشوفوا العروسة الغلبانه اللي أهلها صارفين عليها الشئ الفلاني و مكلفين قعدة التعارف دي شئ و شويات ..رايحين إيد ورا و إيد قدام ..و البت مافيهاش أي عيب و يقولولكم ..لأ أصلها مش شبه نيللي كريم قوي ..دي قالبه شوية على نجلاء فتحي و انا مابحبش النوع ده ..تقولش حسين فهمي رايح يتقدم للبت لا اصل السن مش مناسب الفرق بسيط لزم تكون اصغر منك يجى بخمس سنين كدة لا متنفعشى اصلها من نفس عمرك مالقوش فى الوردة عيب قالوا ياحمر الخدين
لأ و الأفراح ..نككككتة..زمان كنتوا تشوفوا في الأفلام العربي أي بنت تدخل فرح و هي لابسه شيك كده شوية ..يتلموا عليها الشبان و يبقوا عايزين ياكلوها .. و ما تخرجش م الفرح إلا بعريس.. : دلوقتي نفس التجمعات بس بالعكس ...تلاقي كل أم قاعده هي و بناتها مراقبين الشباب و ياويله اللي يعدي جنبهم... طارق ..إزيك يا ولد ..مش تيجي تسلم على بنات خالتك شوف بقوا حلوين إزاي؟...أنا مش طارق يا طنط و أنا متهيألي كده حضرتك مش خالتي ...صحيح؟ معلش يا حبيبي العتب ع النظر طب ما تعرفنا على نفسك كده ..يمكن ربنا يحبك و يبقالك نصيب معانا طبعا الواد يا إما بيطلع يجري ..يا إما حد من صحابه بياخد باله من الكمين اللي وقع فيه ويجي ينقذه على أساس في حد عايزة و كده
طبعا ده غير اللف اللي بيقعدوا البنات يلفوه حوالين العروسة عشان يبقوا واضحين لكل اللي في القاعة من كل الجهات ..و لما بيقف اللف تلاقيهم يزقوا في بعض أو يعملوا انهم بيعدلوا للعروسة فستانها أو طرحتها عشان يطلعوا في الفيديو..و يحاولوا يطلعوا في أكبر عدد ممكن من الصور ..يمكن يعجبوا حد و يتكل على الله و ينتشلهم من عالم الآنسات
الكلام ده كله على فكرة مش المفروض تضحكوا عليه..و الله البنات دول غلابة ..زمان ما كانش مطلوب من أي بنت غير انها تحترم نفسها و تقعد في بيت أبوها و تستنا العدل اللي بيكون في الغالب من إختيار أهلها
دلوقتي الكورة بقت في ملعب البنات ..يعني لازم تخرج و تشتغل و تروح أفراح و تزور أصحابها لأن مسؤلية إحضار عريس بقت ملقاه على عاتقها بالكامل ..أنا أعرف حالات كتيرة أهل البنات بيتخانقوا معاهم خناقات لرب السما عشان يخرجوا و يشتغلوا يا إما عمرهم ما هيتجوزوا ..
و من الجهة التانية المجتمع في حالات كتير و خصوصا خارج القاهرة و الأسكندرية مابيرحمش أي بنت تخرج مع راجل عشان تتعرف عليه و يمكن يبقى فيه نصيب ..ده غير ان الراجل نفسه في الغالب ما بيرضاش بيها و يقولك عايز واحدة خام لا خرجت و لا اتكلمت مع حد غيري تيجى ازاى معرفش رغم نفس الوقت عايز يتفاهم معاها معادلة صعبة شوية
بصراحة المجتمع المنيل اللي احنا عايشين فيه و اللي بيقيم البنت بجوازتها واللي تتجوز بسرعة تبقة شاطرة واللي تتأخر يبقى فيها عيب ..و ع الجهة التانية الراجل من حقه ينقي و يتشرط و يبقى مقطع السمكة و ديلها و يتقال عليه مفتح و مدقدق..و يبقى معدي الأربعين و من حقه يتجوز في أي وقت ان شالله واحده عندها 18 سنة
المجتمع ده ظااالم و مفتري ..و البنات غلابه و الضغط عليهم بيزيد كل يوم والناس بتحاكمهم على حاجه مالهمش يد فيها
_________________
| |
|
| |
de7ka
عدد المساهمات : 327 نقاط : 441
| موضوع: رد: عايزة اتجوز.................. السبت أبريل 03, 2010 1:36 am | |
| ابداااااااااااااااااااااااااااااااع ياموهرا
الموضوع فى قمة الروعه
وفعلا قضيه مهمه جدا المجتمع بيحمل كتير على البنت وبيطالبها بحاجات كتيره اوى وهى ياولداه هتعمل ايه ولا ايه ربنا معانا بقى
شكرا موهرا على مواضيعك المميزه الجميله واحيكى على اختيارك لمواضيعك ياسكره | |
|
| |
mohra sayra
عدد المساهمات : 868 نقاط : 1564 الموقع : egypt
| موضوع: رد: عايزة اتجوز.................. الثلاثاء أبريل 06, 2010 5:29 am | |
| ضحكتى ياقمرايه منوره التوبيك ومواضيعى كلها والله | |
|
| |
ahmed mora
عدد المساهمات : 178 نقاط : 318 الموقع : عنواني كل بقعة تحت السماء
| موضوع: رد: عايزة اتجوز.................. الخميس أبريل 08, 2010 2:52 pm | |
| كله من البناااااااااااااااااااات يا موهرة وانت عارفه كده طبعا دلع البنات وتلبية طلبتهم - جميع طلباتهم- وانهم واخدين راحتهم ذياده عن اللزوم اما بالنسبة للشاب بقي يفضل ان شريكة حياته اللي هتبقي ام عياله افضل انسانه في كل شيء - انا معاكي انها معادله صعبة - بس للضرورة احكام فلازم تكون مؤدبة مش بتروح للعرايس عشان تبين نفسها او امها تعرضها وعلي فكرة دا تفكير غلط منهم - وكمان الشباب عليهم ضغط كبيييييييييييييير مش بيحس بيه الا الشباب بس طبعا انتو ما تعرفهووووووش
يا موهرة انت بتتكلمي في بنية مجتمع كامل ومن الصعب نغير مبادئ مجتمع كبير
الموضوع فوق الرائع يا موهرة تقبلي مروري | |
|
| |
mohra sayra
عدد المساهمات : 868 نقاط : 1564 الموقع : egypt
| موضوع: رد: عايزة اتجوز.................. الجمعة أبريل 09, 2010 5:46 am | |
| احمد مراد اولا شكرا للمتابعه ياقمر
ثانيا انا بتكلم فى شاءعه فعلا بتحصل كتير اليومين دول وبصراحه متجبش الذنب على البنت يعنى هى هتعمل ايه ولا ايه يعنى وبعدين دلوقتى اذا مكانش الولد متعرف على البنت وهارى السكه معاها مشى مش بيفكر يخطبها مش هو دا اللى بيحصل انا عن نفسى مش عاجبنى الحال ده خاااااااااااااااااااالص فين ايام زمان | |
|
| |
ahmed mora
عدد المساهمات : 178 نقاط : 318 الموقع : عنواني كل بقعة تحت السماء
| موضوع: رد: عايزة اتجوز.................. الأحد أبريل 11, 2010 5:00 am | |
| موهرة اولا كلمة " شاءعة " بتنكتب كده "شائعة " ثانيا انا معاكي انها فعلا بتحصل اليومين دول لاء وبكثرة كمان
طيب خلينا نشوفها من جانب تاني لو البنت احترمت نفسها وما ادتش للواد فرصة انه يمشي معاها وانه يهري السكك والموبايلات معاها ......... هل الحال هيبقي كده ؟؟؟؟؟؟؟؟؟
يا موهرة ما نحطش النار جنب البنزين ونقول النار مش هتولع فكري كويس في الموضوع يا موهرة هتلاقي ان الولد هوا المظلوم في الموضوع ده كله
تقبلي مروري يا موهرة التوبيك فعال بجد
| |
|
| |
mohra sayra
عدد المساهمات : 868 نقاط : 1564 الموقع : egypt
| موضوع: رد: عايزة اتجوز.................. الأحد أبريل 11, 2010 5:54 am | |
| اولا شكرا للتصحيح غلطه املائيه ياسيدى الفاضل سورى
ثانيا يعنى ايه البنت احترمت نفسها شويه كده زى ما فى بنات وحشين فى بنات كتيييييييييييييير كويسين نحن هنااااااااااااااااا
وزى ما فى صبيان كويسين فى صبيان كتييييييييييييييير وحشين
مش نجيب كل اللوم على البنت وشوف مين وصل الحاله لكده فى الاول وبعدين نتكلم | |
|
| |
ahmed mora
عدد المساهمات : 178 نقاط : 318 الموقع : عنواني كل بقعة تحت السماء
| موضوع: رد: عايزة اتجوز.................. الأحد أبريل 11, 2010 6:06 am | |
| ليه يا موهرة انت شايفة العيب من مين بقي علي كده وهوا مين السبب في كل اللي احنا فيه
اعترف فعلا ان زي ما فيه بنات وحشة ومش مؤدبة اكيد فيه بنات كتير محترمة ( علي الرغم انهم كلهم عجينه واحده )
ولا اييييييييييييييييييييييييييه ............ ؟ | |
|
| |
mohra sayra
عدد المساهمات : 868 نقاط : 1564 الموقع : egypt
| موضوع: رد: عايزة اتجوز.................. الأحد أبريل 11, 2010 6:10 am | |
| هههههههههههههههههههههههههههه ياسلام كلهم عجينه واحده طب ماهى الرجاله برضه كلهم عجينه واحده خلينا ساكتين بقى والطيب احسن ان الله حليم ستااااااااااار ههههههههه
ومتخليش العداوه تزيد بينا | |
|
| |
| عايزة اتجوز.................. | |
|